Un goberno de principios
A nosa idea da USC é a dunha universidade pública europea que garanta a integración e a participación caracterizada pola codecisión. Unha universidade aberta e en positivo capaz de construír un proxecto de futuro. Estableceremos as garantías e as condicións para facelo, indicando onde queremos chegar e definindo como podemos chegar. O noso modelo é o da participación e a eficacia, a nosa forza a capacidade de gobernarnos autonomamente con responsabilidade.
A mellora da USC é o principio activo do noso goberno. Queremos facelo, sabemos facelo e é necesario facelo con novos principios de goberno:
- A transparencia e a accesibilidade á información.
- Diálogo e procura de consenso, vontade de integración, atención coidadosa á discrepancia e á diferenza para pular a cohesión da comunidade e a institución universitaria.
- Garantía dun marco estábel de igualdade de oportunidades.
- Exercicio do goberno sobre os intereses compartidos pola comunidade universitaria, liberándonos das hipotecas de grupos ou plataformas particulares
- Asumírmonos como universidade completa.
- O impulso de política de apoio para mellorar os nosos rendementos.
- Regras claras e consensuadas para o funcionamento da USC; un marco de regulación con garantías, resultado de políticas coparticipadas e participativas.
- Deseño de políticas de discriminación positiva para atender de xeito diferente as diferencias, garantindo a equidade como guía do autogoberno da USC.
- Establecer a recompensa ao esforzo, non ao labor mínimo e obrigatorio.
- A asunción colectiva dunha cultura xerencial e da profesionalización da xestión.
- A afirmación da USC como servizo público e socialmente responsábel.
- A asunción dunha cultura fiscal e do esforzo e a contribución ao ben común coa achega de todos e todas nós.