Planificación e avaliación docente

Planificación eficiente da organización académica

É imprescindíbel afrontar, cun prazo de resolución non superior a seis meses, a reformulación do actual modelo de organización académica no referente ao modelo de PDA-POD, para que sirva efectivamente para definir as necesidades docentes a cubrir das titulacións actuais e futuras e para evitar a creación de demandas docentes artificiais e, polo tanto, de profesorado.

Este novo modelo a construír principalmente cos Centros e Departamentos debe:

  1. Responder á nova configuración dos procesos de ensino/aprendizaxe, contemplando, pois, todas as tarefas que estes requiren do profesorado, no lugar da “hora de docencia presencial”.
  2. Ser suficientemente flexíbel para englobar os requirimentos distintos de títulos de diferente perfil.
  3. Ter un carácter estábel, que evite que as necesidades se redefinan cada ano.
  4. Primar a corresponsabilidade, recoñecendo o papel central dos Centros na determinación da organización académica xa que lles compete a eles a rendición de contas dos títulos.

Avaliación e recoñecemento da actividade docente

Unha universidade plena é unha universidade con vocación docente e así queremos que sexa a USC. Para isto é imprescindíbel salientar a faceta docente do traballo do PDI e revalorizala curricularmente para ampliar o seu recoñecemento social.

O noso compromiso de goberno é afrontar con firmeza e rigor a avaliación da función docente para recoñecer, como ocorre no campo da investigación, a dedicación, o esforzo e os resultados, e para promover a mellora no seu exercicio profesional.

Neste sentido, a opinión dos e das estudantes é de máxima relevancia; para iso é preciso revisar a fondo o sistema de avaliación da satisfacción dos estudantes coa docencia. Temos que dotarnos dun instrumento de valoración recoñecido como válido e fiábel e tamén como útil por parte dos e das estudantes.

Debemos avaliar en profundidade os resultados da fase de proba do programa Docentia (acreditado externamente, pero aínda non validado internamente) para ver a súa validez á hora de discriminar as boas prácticas docentes, verificar a fiabilidade e a relevancia dos diferentes elementos de avaliación que contén e valorar a súa aplicabilidade. Só na medida en que cumpra estas condicións se poderá considerar unha base sólida para a necesaria avaliación da actividade docente do PDI.

É necesario tamén, se de verdade apostamos pola mellora da calidade docente, sermos rigorosos no cumprimento das obrigas docentes e titoriais e dotármonos corresponsabelmente de mecanismos para verificalo. Cuestión esta que non só é cada vez máis asumida, senón tamén cada vez máis demandada polo conxunto da comunidade universitaria e a sociedade.

Estamos convencidos/as de que unha avaliación rigorosa e comprometida da actividade docente será o piar do seu recoñecemento curricular, que debemos incorporar decididamente no proceso de acceso e promoción na carreira académica. Estamos tamén convencidos/as de que isto só se pode levar a bo termo desde o compromiso e a corresponsabilidade.

PDF, 326 Kb.