Benvida, benvido a páxina da candidatura de Lourenzo Fernández Prieto a reitor da Universidade de Santiago de Compostela, nesta páxina poderás coñecer as miñas ideas para facer entre todos unha Universidade mellor
// 30 de Maio, 2010 // Comments Off // Blog de Campaña
Grazas a todos e a todas. Fixemos un traballo inxente, sentimos o alento das persoas e o cariño foi inmenso. Formamos unha pequena marea de futuro. Xeramos ideas que foron partilladas por un 43% da universidade e iso é impagable. Quedamos contentos co resultado. Só un pouco menos que se gañaramos. Aí estamos para todos e todas vós. Grazas.
// 22 de Maio, 2010 // Comments Off // Blog de Campaña
O luns 24 de maio a USC ten que elixir entre dous modelos: o da Universidade que foi e o da Universidade que pode ser. Comprométome coa Universidade que pode ser, que mira ao futuro e non ao pasado. Non comparto nin a melancolía nin o fatalismo. Non podemos gañar os novos tempos nin afrontar os retos que se nos aveciñan camiñando cara atrás, conxugando e conxurando tempos pretéritos.
Unidade, universidade pública, calidade, e compromiso co País e coa xente da Universidade. Eses son os principios que deberan guiar á Universidade de Santiago de Compostela da segunda década do século XXI. Sobre estes valores, é tempo de lograr unha gran coalición de ideas. Non queremos apañar intereses, senón agrupar vontades para construír o futuro. Queremos ser unha forza de cooperación, que non de ocupación. Esa é a Universidade na que eu creo, e na que credes moitos e moitas de vós. Xa antes do 5 de maio comprometinme cun goberno para todos e todas, e, sobre todo, con todos e todas. Ese é meu estilo e o do meu equipo: o acordo e a busca de puntos de encontro.
(máis…)
// 21 de Maio, 2010 // Comments Off // Blog de Campaña
Este xoves Lourenzo Fernández Prieto participou xunto co profesor Juan Casares Long nun multitudinario debate moderado por Susana López de Correo TV e gravado por diferentes medios. Neste debate repasaron as diferentes partes do programa a poucos días da xornada electoral da segunda volta. Se queres ver o vídeo do debate podes facelo clicando na seguinte ligazón.
// 19 de Maio, 2010 // 2 comentarios » // Blog de Campaña
A Universidade que pode ser está nas nosas mans, nas mans de todos e todas os que cremos nela, daqueles e daquelas que estamos orgullosos de ser da USC. Somos unha grande Universidade e debemos e sabemos dar mostra do que somos.
Queda agora unha segunda volta de cara á elección da nova Reitoría da USC e dúas opcións posibles. Agora é o tempo de decidir entre dous modelos: o da Universidade que foi e o da Universidade que pode ser. É tempo de contrapoñer eses dous modelos a través do debate, porque iso é o que a USC quere e esa é a obriga que temos con ela. E debemos facelo tanto no seo da comunidade universitaria como ante o conxunto da sociedade, porque a Universidade non pode vivir de costas á sociedade que é a súa razón de ser. Poñer trabas ao debate aberto sería regresar a modelos decimonónicos. Sería como poñer cancelas ao vento: a ese aire fresco da xente e do País que debe entrar na nosa institución por cada porta e por cada fiestra, porque é o que nos revive socialmente e a corrente que nos levará a un futuro no que as universidades sexamos parte da solución e non do problema.
// 18 de Maio, 2010 // Comments Off // Blog de Campaña
Din que ben acaba o que ben comeza. Na véspera da campaña o día comezou ben e rematou ben. Pola mañá, cunha xuntanza na Facultade de Física; pola tarde, cun encontro dixital en El Correo Gallego e co debate organizado pola Sociedade de Debate de Competición da USC (SoDeCo).
O estudantado é a sociedade que está neste momento na Universidade. Debemos escoitar as súas propostas, porque a través deles chega o aire fresco que ten que renovar a Institución. Con iniciativas como a promovida hoxe por SoDeCo, demóstrase que o estudantado está polo debate, que a sociedade quere debate. Porque o debate de ideas é necesario para as sociedades democráticas e é necesario para a Universidade.
// 6 de Maio, 2010 // 1 comentario » // Blog de Campaña
Polos vosos votos, polas vosas mensaxes de apoio e de forza, polo voso traballo e esforzo na gran campaña que fixestes, polo voso compromiso cunha universidade pública, galega e aberta ao mundo, por axudarnos a mellorar as nosas propostas para unha Universidade mellor, pola vosa participación e implicación nos asuntos da vida Universitaria, por achegarvos a nós e facernos preguntas e suxestións, por debater as ideas connosco, porque xuntas/os e unidas/os podemos mellorar a USC.
MOITAS GRAZAS
Lourenzo
// 5 de Maio, 2010 // Comments Off // Blog de Campaña
A candidatura de Lourenzo foi a segunda máis votada nas eleccións á reitoría da USC, a só dez votos da primeira, a de Juan Casares Long. Iso quere dicir que estamos colocados na segunda volta, a definitiva, que se celebrará o luns 24 de maio. Moitas grazas a todas e a todos por este voso primeiro apoio. Agora debemos xuntar aínda máis forzas para conseguir un cambio a mellor para esta Universidade.
// 3 de Maio, 2010 // 1 comentario » // Blog de Campaña
Compañeiras e compañeiros, hoxe é o día final desta campaña. A última xornada dunha intensa xeira que comezou hai xa uns meses coa decisión de presentarme candidato a reitor da USC. Coa vosa simpatía saquei adiante esta candidatura, e agora que estamos en vésperas das eleccións, quixera agradecervos todo o voso apoio, comprensión e colaboración, dende todos os ámbitos da comunidade universitaria, para impulsar, de vez, un cambio a mellor nesta Universidade.
Despois desta campaña intensa, hoxe estou máis convencido que nunca de que o imos conseguir. Conto con todas e todos vós para votar o día 5 por ese cambio positivo, por esa Universidade pública, de calidade, aberta ao mundo e comprometida co país, que é a que sabemos, debemos e podemos facer. Moitas grazas de corazón. O futuro está nas nosas mans.
Saúde e saúdos,
Lourenzo
// 3 de Maio, 2010 // Comments Off // Blog de Campaña
Lourenzo Fernández Prieto pechou hoxe en Compostela a súa campaña de cara á elección da nova Reitoría da Universidade de Santiago de Compostela, o próximo 5 de maio. En declaracións aos medios na Facultade de Ciencias Políticas, quixo lanzar a súa mensaxe de fin de campaña cunha chamada ao voto, no convencemento de que “cada voto é imprescindible para construír entre todos e todas a Universidade que queremos”. Neste senso, Fernández Prieto dixo que a súa candidatura “quere representar unha visión de como debe ser a universidade pública galega do século XXI”.
(máis…)
// 3 de Maio, 2010 // Comments Off // Blog de Campaña
Ao final foron 7 as propostas das que enviastes a esta web as que decidimos incorporar ao noso programa, e que levaremos a cabo se nos votades para o goberno da USC. O equipo da candidatura examinounas todas con atención, e viu que algunhas das ideas que mandabades xa estaban presentes no programa de maneira máis ou menos similar.
Aquí vos detallamos as propostas incorporadas, tanto as que non estaban no programa como as que si. Moitas grazas a todas e a todas pola vosa participación. Asegurámosvos que cando Lourenzo sexa reitor poderedes seguir contribuíndo directamente a facermos entre todos unha Universidade mellor.
// 3 de Maio, 2010 // Comments Off // Blog de Campaña
// 30 de Abril, 2010 // Comments Off // Blog de Campaña
O catedrático de Historia Contemporánea Lourenzo Fernández Prieto valorou hoxe o que foi a campaña de cara á elección o próximo 5 de maio da nova Reitoría da USC. En declaracións aos medios, o candidato a San Xerome quixo agradecer aos outros candidatos e candidatas “que aceptaran levala pola vía do debate e pola busca do que nos achega, máis que sobre o que nos separa porque esa era a campaña que quería a comunidade universitaria”. “Ese é o camiño e ese é o meu estilo”, apostilou.
(máis…)
// 29 de Abril, 2010 // Comments Off // Blog de Campaña
// 28 de Abril, 2010 // 1 comentario » // Blog de Campaña
Quedan poucos dias para as eleccións á reitoria da USC. Se queres participar ou colaborar coa campaña de Lourenzo, aínda o podes facer de moitos xeitos.
1. Coñece o teu candidato e o seu equipo:
// 27 de Abril, 2010 // Comments Off // Blog de Campaña
// 26 de Abril, 2010 // Comments Off // Blog de Campaña
Na mañá deste luns presentamos o equipo de sete vicerreitoras e vicerreitores que acompañan a Lourenzo Fernández Prieto na súa candidatura a San Xerome. Un equipo que gobernará “para toda a Universidade”, en palabras do candidato a reitor.
// 26 de Abril, 2010 // Comments Off // Blog de Campaña
Lembra que se o día 5 de maio non vas estar na USC, podes votar anticipadamente os días 29 e 30 de abril e 3 de maio. Só tes que acudir ao Rexistro Xeral (na Reitoría de Santiago ou no Edificio de Servizos Administrativos en Lugo), de 9 a 14h, levando o teu DNI e unha fotocopia. Alí mesmo terás disponibles as papeletas.
E, para votar o día 5, lembra que:
Só o estudantado de 1º/2º ciclo e de Grao/Máster e o profesorado funcionario doutor, vota na súa Facultade ou Escola.
Se pertences a outro sector, podes consultar o lugar onde te corresponde votar, aquí.
// 25 de Abril, 2010 // Comments Off // Blog de Campaña
Facer unha campaña electoral no século XXI, e máis nun contexto universitario, require estar onde están os estudantes, non só para tratar de comunicarlles as túas ideas o máis directamente, senón para recibir un feedback franco e cercano.
Un dos principais lugares de encontro dos universitarios galegos do 2010 é o Tuenti. Hai unhas semanas fixen un perfil nesta rede e convoquei un evento para convidar os estudantes a participar nas eleccións á reitoría da USC o vindeiro 5 de maio. Cada día engado ducias de amigas e amigos e recibo varias peticións de amizade de xente que non coñezo, pero que se interesa por saber máis sobre as nosas propostas para a próxima etapa reitoral.
// 23 de Abril, 2010 // Comments Off // Blog de Campaña
Hoxe presentámoslle o noso programa á comunidade universitaria das facultades de Filoloxía e Matemáticas. Alí, Lourenzo Fernández Prieto apostou por unha política académica e para o Persoal Docente Investigador (PDI) con normas duradeiras e procedementos de mellora axeitados. Neste ámbito, sinalou tres puntos fundamentais na súa proposta: a captación dos mellores talentos para a USC, a estabilización e a promoción na carreira académica, e a redución da burocracia que afoga a docentes e xestores, unha necesidade na que vén insistindo e que considera un eixo fundamental do que será a súa actuación desde San Xerome.
(máis…)
// 22 de Abril, 2010 // Comments Off // Blog de Campaña
Continuamos a nosa campaña cara ás eleccións á USC. Hoxe fixemos tres actos de presentación do seu programa: na Escola Universitaria de Enfermería, e nas Facultades de Física e Ciencias Económicas e Empresariais. Neste último centro, Lourenzo fixo unha aposta pola sustentabilidade da USC que pasa por dúas vías: “Acadar novas vías de ingreso e a eficiencia tanto no gasto como no investimento”.
Neste camiño, o catedrático reiterou o compromiso de asinar, no seu primeiro ano como reitor, un acordo de financiamento estable coa Xunta que dea cobertura a un período de dez anos. ”Este financiamento debe garantir en primeiro termo a sustentabilidade da USC, e financiar o ben feito en docencia, investigación e internacionalización”.
Precisamente, co fin de obter máis recursos, o candidato quere aproveitar estas grandes fortalezas da USC: ser unha Universidade moi investigadora (entre as 7 primeiras do Estado) e moi internacional (entre as 5 primeiras). “Isto permítenos conseguir moitos recursos e acceder a moitos xacementos”, dixo.
(máis…)
// 21 de Abril, 2010 // Comments Off // Blog de Campaña
Lourenzo Fernández Prieto abriu hoxe en Lugo a súa campaña de cara a elección, o próximo 5 de maio, da nova Reitoría da USC. En declaracións aos medios ao termo do acto de presentación do seu programa na Escola Politécnica, Fernández Prieto comprometeuse a “ser o reitor de Lugo”, e neste camiño adiantou que terá despacho aberto e permanente na cidade. “Lugo terá un reitor e unha xestión eficaz no campus”, asegurou.
// 21 de Abril, 2010 // Comments Off // Blog de Campaña
Coa situación de crise económica que estamos a vivir, son moitos e moitas os que se preguntan se as políticas de xénero se seguirán aplicando ou se son políticas que só teñen cabida en épocas de vacas gordas. Pois ben, hoxe facémonos eco desta cuestión que se formula en círculos políticos, económicos e sociais e trasladámola á Universidade de Santiago de Compostela para saber qué opina ao respecto o candidato a reitor Lourenzo Fernández Prieto.
Segundo o Catedrático de Historia Contemporánea, a falta de recursos pode modificar o “como” dunha política de igualdade, pero nunca o obxectivo final. Fernández Prieto asegura que, a falta de cartos, hai que buscar solucións comprometendo a outros actores neste empeño e ideando accións innovadoras que non teñen por qué levar asociado un custo económico.
Cita, por exemplo, a necesidade de avanzar nas actuacións de visibilización das mulleres como xeradoras de coñecemento, de ciencia. “Todos coincidimos , con matices, na importancia das publicacións científicas na nosa profesión”, indica quen podería ser o próximo reitor da USC ao tempo que se compromete a buscar apoios e acordos para conseguir que nas bases de datos dispoñibles se identifiquen tamén os homes e as mulleres.
(máis…)
// 20 de Abril, 2010 // Comments Off // Blog de Campaña
O catedrático de Historia Contemporánea Lourenzo Fernández Prieto iniciou hoxe a campaña de cara á elección, o próximo 5 de maio, da nova reitoría da USC. Fernández Prieto dixo presentarse co convencemento de que será a candidatura máis votada, porque “son moitos e moitas os que coma min queren esta Universidade e senten orgullo de pertencer a ela”.
“Durante estes días de precampaña, tiven ocasión de compartir impresións con moitos membros da comunidade universitaria, que serviron para reafirmarme na visión de que somos unha grande Universidade, de que sabemos facer Universidade”, dixo.
(máis…)
// 19 de Abril, 2010 // 1 comentario » // Blog de Campaña
O catedrático de Historia Contemporánea, Lourenzo Fernández Prieto, presentou hoxe en Compostela a estratexia de investigación e internacionalización recollida no programa da súa candidatura a San Xerome. O candidato ao reitorado da Universidade de Santiago dixo que a súa é unha aposta por “pór a potente maquinaria de apoio á investigación da Universidade ao servizo de todos os investigadores, que estarán no centro do funcionamento e da administración universitaria”.
(máis…)
// 16 de Abril, 2010 // Comments Off // Blog de Campaña
O máster de secundaria é un dos temas que máis preocupan neste momento aos estudantes da USC. Xa hai máis dun ano Lourenzo Fernández Prieto comentaba nas páxinas de La Voz de Galicia a súa oposición ao máster tal e como estaba formulado.
// 16 de Abril, 2010 // Comments Off // Blog de Campaña
Como xa fixo con outras iniciativas do programa, Lourenzo Fernández Prieto, presentou hoxe en Compostela a estratexia de cultura e servizos recollida no programa da súa candidatura a San Xerome, en liña cos principios de universidade pública, compromiso, codecisión, calidade e país que guían a súa proposta. O candidato ao reitorado da USC dixo que a súa é unha aposta “para pór en valor o que é de todos, porque a Universidade é custodia de bens públicos que deben ser postos ao servizo da sociedade”. Entre as súas principais apostas están as residencias universitarias, a Universidade de Verán, e a creación dun Centro de Difusión e Coñecemento do Patrimonio Cultural e Científico.
// 15 de Abril, 2010 // Comments Off // Blog de Campaña
Con Lourenzo, melloraremos esta Universidade entre todas e todos.
// 14 de Abril, 2010 // Comments Off // Blog de Campaña
Lourenzo participou onte no debate organizado polo Foro Galicia Milenio na Fundación Caixanova. Esperamos que este fora o primeiro da serie de debates que Lourenzo propuxo aos reitorables para a posta en común de ideas arredor da Universidade e para que a comunidade que conforma a USC poida ver que cousas os unen e que os separa. Nas intervencións que tivo onte no Foro, Lourenzo aproveitou para reiterar aos seus compañeiros/as candidatos/as a proposta de máis debates, sectoriais e por campus. Insistiu en que pola súa parte iría a todos sen pór ningunha condición. “É algo positivo, interesante, que permitirá elixir e sobre todo permitirá contrastar, debater e exercitar algo marabilloso que é a democracia universitaria”.
No decurso do debate, Lourenzo dixo non compartir a melancolía nin o fatalismo na visión da USC. Recalcou que o seu é un programa baseado nos principios de universidade pública europea, compromiso, codecisión, calidade e país. A medida que avanzaba o debate seguindo as liñas temáticas introducidas polo Foro Galicia Milenio, volveu incidir nalgunha das medidas propostas no seu programa, que xa tiña anunciado ao longo da última semana, e que podedes consultar máis polo miúdo noutros posts do blog ou na propia web. Antes do inicio oficial da campaña o martes, Lourenzo irá debullando as súas propostas programáticas ata completar todas as áreas estratéxicas, como xa fixo coa estratexia de goberno, a estratexia académica, e a estratexia xerencial, financeria e de infraestruturas. Manterémosvos ao día.
// 14 de Abril, 2010 // Comments Off // Blog de Campaña
Se o luns coñecíamos a estratexia académica da candidatura de Lourenzo Fernández Prieto á reitoría da USC, hoxe foi tempo para coñecer a súa estratexia en materia de financiamento. O Catedrático de Historia presentou hoxe en Compostela a estratexia xerencial e financeira recollida no programa da súa candidatura a San Xerome, en liña cos principios de universidade pública, compromiso, codecisión, calidade e país que guían a súa proposta. Trátase, segundo explicou, de facer que “unha moi boa Universidade, como é a de Santiago, mellore neste campo para garantir a sustentabilidade en termos económicos”.
Lourenzo Fernández Prieto, comprometeuse hoxe a asinar, no primeiro ano como reitor da Universidade de Santiago, un acordo de financiamento estable coa Xunta de Galicia que dea cobertura a un período de 10 anos. (máis…)
// 13 de Abril, 2010 // 1 comentario » // Blog de Campaña
Lourenzo Fernández Prieto entende que gobernar a USC é contar coa opinión de todos e todas. Por iso, te animamos a que se tes algunha idea para mellorar esta Universidade, non dubides en facérnolo saber. Só che levará 20 segundos rexistrarte e, de seguido, no apartado “As túas ideas” poderás expoñer a túa proposta ou votar por aquela que máis che guste.
De entre as 5 ideas máis votadas de todas as que nos vaiades enviando durante a campaña electoral, Lourenzo Fernández Prieto e o seu equipo elexirán unhas cantas e incluiranas no seu programa. E se é a túa?
No seguinte vídeo, Manuel Fernández Grela, explica na Facultade de Historia en que consiste o Programa Aberto da candidatura de Lourenzo Fernández Prieto:
// 12 de Abril, 2010 // 1 comentario » // Blog de Campaña
Presentámosche a modo resume as claves da estratexia académica recollidas no programa candidatura ao reitorado de Lourenzo Fernández Prieto:
// 12 de Abril, 2010 // Comments Off // Blog de Campaña
O catedrático de Historia Contemporánea, Lourenzo Fernández Prieto, presentou esta mañá en Lugo a estratexia académica recollida no programa da súa candidatura ao reitorado da Universidade de Santiago. Trátase dunha estratexia académica asentada nos principios que articulan a súa proposta: Universidade pública europea, compromiso, codecisión, calidade e país.
Fernández Prieto constrúe unha estratexia docente para o futuro da Universidade de Santiago buscando afortalar a universidade pública. “É un compromiso decidido pola formación do estudantado universitario galego e por situar á USC como referente pola súa calidade para a atracción de novos e novas estudantes”, dixo. (máis…)
// 12 de Abril, 2010 // Comments Off // Blog de Campaña
Os sete candidatos á Reitoría da USC fronte ao Hostal dos Reis Católicos. Foto:Antonio Hernández. El Correo Gallego.
Lourenzo Fernández Prieto, xunto co resto de candidatos á Reitoría da USC, participou no café de redacción organizado polo Grupo Correo Gallego no Hostal dos Reis Católicos. Sen dúbida, o almorzo constituiu unha boa oportunidade para coñecer as claves dos proxectos dos reitorables e a súas opinións sobre os asuntos de actualidade que máis afectan á Universidade de Santiago. Entre eles, a posibilidade de pacto entre os candidatos, a saúde económica da USC e as cuestións relativas ao Selo Campus Vida.
(máis…)
// 9 de Abril, 2010 // Comments Off // Blog de Campaña
Lourenzo Fernández Prieto, no centro, acompañado polo seu equipo. Foto: Ramón Escuredo. El Correo Gallego.
Xa se van coñecendo as liñas básicas do programa da candidatura de Lourenzo Fernández Prieto á Reitoría da USC. Polo dagora, teremos que agardar para saber cales son as súas propostas no referente ás estratexias académica, científica, de calidade e da nova Xerencia da Universidade compostelá, que se avanzarán nos próximos días, pero, a cambio, xa temos claro cales serán os puntos fortes do seu programa.
O candidato á Reitoría da USC, arroupado polo seu equipo, presentounos na Facultade de Ciencias da Comunicación de Compostela. Falou de cinco principios: Universidade Pública, Compromiso, Codecisión, Calidade e País. (máis…)
// 9 de Abril, 2010 // Comments Off // Blog de Campaña
Benvido e benvida ao meu blog, un espazo no que poderás coñecer de primeira man as propostas da miña candidatura para o futuro da Universidade de Santiago de Compostela.
Como ben saberás, a USC formámola todos e todas e é por iso que todos e todas temos dereito a facernos escoitar. Dende aquí, anímote a que participes nas eleccións do próximo 5 de maio e neste blog, onde darei resposta ás dúbidas, críticas, ideas e suxerencias que nos achegues.
Estamos na fin dun modelo de universidade nacido hai 25 anos, que cumpriu a súa función pero que remata definitivamente no 2010 coa converxencia europea. O cambio é necesario e inevitable, pero hai que asegurar que o sentido do cambio sexa o do futuro.
Contamos contigo.
